Компанијата Xiaomi се подготвува за масовно производство на смартфони со камери кои се сместени под екранот. Оваа технологија ќе биде дел од смартфоните од наредната година.
Се работи за третата генерација на технологија која ја разви Xiaomi, но треба да имаме предвид дека и првата и втората верзија сè уште не се достапни на пазарот.
Од Xiaomi тврдат дека оваа селфи камера ќе ги има истите спецификации како и стандардните предни камери. Засега не е познато дали станува збор за OLED или LED панел, а нема информации ниту за резолуцијата.
Иако произведувачот тврди дека камерата не се забележува, сепак може да забележите сенка во левиот агол на горната страна во облик на коцка.
И фотографиите објавени на Twitter покажуваат нешто слично - многу мала разлика во бојата на местото каде што се наоѓа камерата, пишува The Verge.
Произведувачите на смартфони веќе некое време ги тестираат камерите коишто се сместени под екранот, но оваа идеја сè уште не е комерцијализирана. Xiaomi и Oppo ја претставија ваквата технологија во јуни минатата година, компанијата Vivo исто така. Од ZTE истакнаа дека веќе во септември ќе го претстават смартфонот ZTE Axon 20 5G со камера под екранот.
