Париз, 4 мај 2020 (МИА) – Од денеска голем број европски земји почнуваат да укинуваат некои од рестриктивните мерки наметнати поради пандемијата со COVID-19.
Италија – Италијанците ќе можат да ги посетуваат своите роднини, да се собираат во ограничени групи, смее да се отворат парковите, но со строго држење физичка дистанца меѓу луѓето во нив. Работата во градежништвото и трговијата на големо е целосно обновена. Кафулињата, рестораните и баровите ќе продаваат храна само за носење. Училиштата нема да се отворат до септември. Остануваат ограничувањата за движење од една до друга област. Маските треба да се носат на аеродромите и станиците, како и во јавниот превоз. Патничките летови на аеродромите во Cампино во Рим и Перетола во Фиренца, кои беа меѓу аеродромите привремено затворени поради епидемијата, се обновени.
Шпанија – Почнувајќи од денеска, обновена е работата на мали трговски објекти како фризерски салони што можат да примат индивидуални клиенти по претходно закажан термин. Баровите, кафулињата и рестораните ќе продаваат само храна за носење. Маските се задолжителни во јавниот превоз. На Канарските Острови и Балеарскиот архипелаг ќе им биде дозволено да отворат повеќето продавници, музеи и тераси на барови и ресторани, но со ограничен капацитет. Училиштата остануваат затворени до септември.
Грција – Речиси 10 проценти од затворените продажни салони ќе можат да отворат врати, вклучително и книжарници, продавници за електроника, оптичари, места за проверка на возила, продавници за спортски производи, продавници за градинарски материјали, фризерски салони и салони за убавина. Црквата ќе отвори врати за индивидуални молитви.
Португалија – Малите локални продавници и фризерски салони се отвораат, продолжува работата на автосалоните и книжарниците. Даночните служби исто така отвораат врати по претходно договорен состанок и бараат носење заштитна маска. Заштитните маски стануваат задолжителни во јавниот превоз. Индивидуални спортови на отворено се дозволени.
Германија – Училиштата постепено се отвораат од денеска во некои провинции. Ќе може да отворат фризерските салони. Продолжува отворањето храмови, музеи и зоолошки градини. Баровите и рестораните само ќе вршат испораки за дома. Заштитните маски стануваат задолжителни во транспортот и продавниците.
Австрија – Отвораат дел од училиштата. Заштитните маски се задолжителни во јавниот превоз и продавниците.
Белгија – Бизнисите што не примаат посетители ќе отворат, а маските ќе станат задолжителни за јавниот превоз.
Унгарија – Надвор од Будимпешта, кафулињата и рестораните може да работат со ограничен капацитет на летните тераси. Професионалните спортисти може да се вратат на индивидуални тренинзи. Маските се задолжителни во продавниците и јавниот превоз.
Полска – Отвораат хотели, трговски центри, дел од културните институции, вклучувајќи ги библиотеките и некои музеи.
Хрватска – Продолжуваат со работа услужните дејности каде има близок контакт со клиенти, како што се фризерски салони.
Словенија – Од денеска се отвораат терасите на кафулиња и ресторани, како и музеи, фризерски салони и книжарници. Професионалните спортисти може да се вратат на тренинг. Маски се потребни во затворени простории на јавни места, во јавен превоз и во продавници.
Србија – Кафулињата и рестораните може да работат со запазување на строга физичка оддалеченост, маските стануваат задолжителни во јавниот градски превоз, како и во автобусите и возовите.
Исланд – Универзитетите, музеите и фризерските салони повторно се отвораат.
