За неверојатното промашување на Сеферовиќ против Барса уште долго ќе се зборува, а и генерациите во иднина од него ќе учат како не треба.
Тренерот на Бенфика, Жорже Жезуш, не може да поверува како еден професионален фудбалер може да промаши толкав празен гол. Синоќа швајцарскиот репрезентативен напаѓач Харис Сеферовиќ имаше колосална шанса да ја потопи Барселона, излезе сам пред голот, но некако успеа да промаши, на неверување на сите.
„За 30 години како тренер никогаш немам видено вакво нешто, но ете се случи. Ми се случи мене и на Бенфика“, рече Жезуш сѐ уште во неверување.
Во третата минута од судиското надополнување Бенфика одигра брз контра напад, Сеферовиќ прво мајсторски го мина голманот Тер Штеген, но потоа успеа да шутне крај левата статива. Тренерот Жезуш во тој момент падна на колена и ја заби главата в земја во неверување.
„Тимот создаде шанси, остваривме резултат кој нѐ остави во позиција да сонуваме (за пласман во осминафиналето, заб. на прев), но не зависи од нас. Имаме шанса бидејќи останува уште еден натпревар до крајот. Во борба сме со Барселона, со тим кој цели да ја освои Лигата на шампионите“, додаде португалскиот стартег.
Табелата вели дека Барселона е втора со 7 бодови, а Бенфика е трета со 5.
Бенфика во последното коло го пречекува киевски Динамо во Лисабон и има императив победа. Но, будно ќе го следи и резултатот во Минхен каде Барселона ќе му гостува на Баерн. Доколку Барса победи, тогаш Бенфика не ја спасува ништо, но секој друг резултат на Барса, па и реми, ќе им одговара на Португалците, се разбира, доколку го победат Динамо. При ист број на бодови, а тоа може да се случи со сценарио Барса да ремизира и Бенфика да победи, второто место ќе му припадне на португалскиот тим поради подобриот меѓусебен скор (победа 3:0 во Лисабон и реми 0:0 во Барселона).