Екстремно големите разлики во цените не се последица само на поевтината работна сила во Кина, каде што мал електричен автомобил може да се купи за околу 4.000 евра, туку и на различниот пристап кон електромобилноста.
Дека цените на електричните автомобили во Кина се многу пониски отколку во Европа - не е нешто ново. Затоа европските производители, но и законодавците, се обидуваат да го ограничат појавувањето на „кинеските“ на европските пазари, сметајќи дека претставуваат нелојална конкуренција.
Ваквата разлика, меѓутоа, не е само последица на поевтината работна сила во Кина, туку и поинаков пристап кон електромобилноста.
Додека за многу добро развиената европска автомобилска индустрија, развојот на електричните автомобили како нов масовен производ (не вклучувајќи различни индивидуални студии и прототипи) дојде донекаде принудно, а не како некакво неопходно зло, во Кина ситуацијата се одвиваше нешто поинаку.
Најнаселената земја во светот се одлучи за евтино масовно производство, што ќе овозможи многу побрза и помасовна електрификација на возниот парк во земјата. Ваквото масовно производство, поддржано со обилни државни субвенции (кои сѐ повеќе се намалуваат и/или се укинуваат во Европа), доведува до многу поповолни цени, а со тоа и до поголема продажба.
Според анализата на JATO Dinamycs, на клиентите во Кина им се нуди избор од 235 електрични модели. Во Европа оваа понуда е помала за дури 100 модели, додека во САД се сведува на само 51 модел на електрични автомобили.
Истовремено, просечната цена на електрично возило во Кина е 31.165 евра, додека во Европа е повеќе од двојно повисока - 66.864 евра. Просечниот електричен автомобил во САД чини дури 68.023 евра.
Оттука произлегува дека просечниот електричен автомобил во Кина е 9% поевтин од споредлив модел напојуван од фосилни горива. Во Европа, пак, еквивалентниот електричен автомобил е дури 40% поскап од неговиот колега со СУС мотор.
Како што е случајот со класичните возила, понудата на електрични автомобили во Кина е таква што секој може да најде нешто што одговара на неговиот џеб. Затоа, не треба да чуди што цената на најевтиниот електричен автомобил на кинескиот пазар, моделот BAW Pony е 3.772 евра.
Во последниве години, крајната цена на автомобилите во Европа и Америка беше под влијание на прекините во снабдувањето и недостигот на суровини и компоненти (поради пандемијата на коронавирус, војната во Украина...), високите плати за работниците во автомобилската индустрија, а во случајот со електричните возила и цената на батериите.
Од друга страна, аналитичарите на JATO Dynamics предупредуваат дека еден од аспектите што може да влијае на драстично пониските цени на кинеските електрични автомобили е сомнежот за принудна работа на вработените во автомобилската индустрија.
