Благодарение на серијата „The Last of Us“, и претходно на „The Mandalorian“, Педро Паскал моментално е еден од најбараните актери во Холивуд, но само малкумина знаат дека си го сменил презимето.
Паскал по потекло е од Чиле и е роден како Хосе Педро Балмаседа. Неговото семејство било принудено да го напушти Чиле кога тој имал само 9 месеци. Неговата мајка Вероника Паскал и таткото Хосе Балмаседа биле активни во групите на отпорот кои се обидувале да ја соборат воената диктатура на Аугусто Пиноче.
Вероника извршила самоубиство во 1999 година, па актерот одлучил во нејзина чест да го земе презимето на мајка си.
„Секогаш ме поддржуваше со сето свое срце. Имав чувство дека знае нешто што јас не го знаев. Да не беше таа, никогаш немаше да станам успешен“, рече тој во 2020 година во интервју за People.
Додаде дека се одлучил на овој чекор и затоа што Американците имале проблеми со изговорот на презимето Балмаседа. Сакал и името да си го промени во Александер.
„Бев подготвен да направам апсолутно сè за да работам повеќе. Ако оние што го правеа кастингот беа збунети затоа што се викам Педро, јас бев подготвен да го сторам тоа. Сепак, тоа не профункционира“, заклучил Педро Паскал.
