Не очајувајте ако во моментот немате можност да се почестите со ново палто - минатогодишниот модел можете да го обновите со менување на деталите или поставата, со соодветно одржување.
Ако не сте во можност да го однесете палтото на хемиско чистење за да се уверите дека е свежо и чисто за оваа сезона, користете ги овие совети.
Кога облеката е спакувана, лесно се гужва. Потоа на неа се формираат набори, а поради нив изгледа старо и истрошено. Не го пеглајте палтото, само кон него насочете ја пареата од пеглата. Ако никогаш досега не сте пареле облека, закачете го палтото на закачалка на задната страна од вратата и поминете го со парен апарат или пегла од крај до крај, но држејќи растојание.
Еден од најефективните и најевтините начини за целосно менување на изгледот на палтото е да ги смените неговите копчиња. Секако, треба да се водите според големината на дупките на палтото, а понекогаш многу светлите бои на копчињата ќе ја направат многу потребната промена. Комбинирајте ги и материјалите - дрвени, тапацирани или метални копчиња можеби се вистинскиот избор за модната промена што ја барате.
Јаки, крагњи и манжетни од вештачко крзно веќе со години се популарни. Уште подобро, многу од овие делови се отстранливи и се перат во машина. Прво проверете ја етикетата и ако е така, превртете го наопаку палтото и ставете го на ладно перење на 30 степени користејќи благ детергент. Оставете го да се исуши на широка закачалка, отстранувајќи го вишокот вода така што ќе го ставите помеѓу две крпи. Кога ќе се исуши, исчешлајте ги влакната од јаката со мека четка.
Ако палтото ви е од волна, веројатно ќе забележите формирање на грутки, топчиња од волна. Тие обично се наоѓаат под пазувите и каде што вашата чанта отстрана се трие. Тоа го предизвикуваат искинати влакна, а најчесто се јавува кај облека од волна измешана со синтетички ткаенини, како полиестер.
Овој вид на дотраен материјал ќе направи вашето палто да изгледа постаро отколку што навистина е, па затоа е добра идеја да го отстраните. Користете машинка за џемпер, која ќе ја освежи секоја површина брзо и без никакви оштетувања. Ако вашето палто е направено од кашмир, обидете се да користите самолеплив валјак за исклучително нежно отстранување.
