Порано од очекуваното, денеска во продажба во Скопје излезе албумот на Panini каде за прв пат ја има и репрезентацијата на Македонија.
Продажбата низ цела Македонија, како што беше најавено, ќе почне од 5 април, но денеска колекционерите од главниот град добија мало изненадување откако албумот се појави во продажба во продавницата за странски списанија „Свет“ на ул. „Максим Горки“ во самиот центар.
Од утрината се забележуваше ред за влез и набавка на долгоочекуваниот албум. Се влегува по еден купец, а редот граѓаните одлично го запазуваат и почитуваат. Пред влезот има и средство за дезинфекција.
Албумот чини 80 денари, додека едно пакетче е 40 денари, а во него има по 5 сликички. Со самиот албум добивате 6 гратис сликички, што е задржување на стандардот од претходните првенства. Има вкупно 654 сликички плус уште 14 кои се означени со латиничната буква C.
Како што велат од дистрибутерот, од утре албумот ќе се појави и во други продавници низ Скопје, додека дистрибуцијата низ цела Македонија почнува од понеделник.
Сега уште да се вакцинираме, па сите на Фонтана во парк да се менуваме.
