Предводникот на „Старата дама“ ги пофали играчите за синоќешниот натпревар против Аталанта, но повторно се осврна и на одземените 15 бодови.
Јувентус синоќа одигра возбудлив натпревар со Аталанта полн со пресврти и голови, а на крајот двата тима ги поделија бодовите играјќи 3:3.
„Момците одиграа добро против една талентирана и физички подготвена Аталанта, не беше лесно да се остане сконцентриран, но покажавме професионализам, одговорност и желба да продолжиме да ја работиме работата што ја започнавме“, почна Масимилиано Алегри говорејќи за DAZN.
„Мора да продолжиме да си ја работиме нашата задача, која е на теренот. Мора да им се заблагодариме на играчите за она што го направија на теренот бидејќи знам дека психолошки е тешко одеднаш да се видиш себеси како паѓаш од второ или трето место на 10-то. Чувството е како да ви одземале нешто што сте постигнале. Трерба да им се честита и на играчите и на стручниот штаб кој работеше со нив“, додаде.
Поради одземените 15 бодови сега на Јуве ќе му треба навистина одлична втора полусезона за да обезбеди пласман меѓу првите четири на табелата и место во Лигата на шампионите за наредната сезона. Моментално заостанува 14 бодови зад Рома, која се наоѓа на 4. место.
„Не знам дали ќе успееме во тоа. Мислам дека со 71 бод веројатно се обезбедува Лига на шампиони. Тешко е, играме во Серија А, Копа Италија, Лига Европа, па ќе треба да одиме чекор по чекор. Невозможно е да се мисли толку далеку во иднината. Имавме 38 бодови, минус два што ни беа одземени (мисли на поништениот гол за победа против Салернитана, заб. на прев,), ќе бевме таму горе пред останатите. Останува фактот дека Наполи има неверојатна сезона“, заврши Макс Алегри.
