Езџан Алиоски е директниот виновник за примениот гол бидејќи со еден несмасен старт во 12. минута го собори незгодниот Хвича Кварацхелија и на Грузијците им подари пенал кој успешно го реализираа.
„Пеналот беше момент, една секунда, пад на концентрација... Не стигнав на време да блокирам! Но, тој момент го поминавме, се вративме во игра и израмнивме. Кога тргнавме на победа се случи црвениот картон. Задоволни сме од играта, од темпото...“, рече Алиоски по натпреварот кој заврши 1:1.
И со нерешениот резулат тој е задоволен, бидејќи како што вели, целта од првите два натпревара биле минимум 4 бодови, односно победа и реми, како што впрочем и се случи.
„Двата натпревара кои се зад нас беа многу важни затоа што по 9 месеци сме заедно. Многу важни натпревари, многу добри резултати со кои се подготвуваме за дуелот со Косово. Нашиот таргет сега беше да освоиме минимум 4 бода на овие два натпревара“, вели тој.
Наредниот натпревар на македонската репрезентација е веројатно најважниот досега, полуфиналниот бараж за пласман на ЕУРО и тоа против Косово во Скопје на 8 октомври.
„Сега на ред е Косово. Имаме шанси да ги победиме, сега тие се нашиот таргет“, заврши Џани.
