Поради војната во Украина, Германија нема намера да се откаже од американското нуклеарно оружје што се наоѓа во земјата. Deutsche Welle ја посети базата на Бундесверот каде пилотите вежбаат со децении во случај да треба да лансираат нуклеарни бомби.
Ако навистина се згусне, неговите пилоти би лансирале атомски бомби. Томас Шнајдер (56) е полковник на германските воздухопловни сили и командант на 33-то тактичко крило на германското воздухопловство. Носи пилотски комбинезони, околу него во канцеларијата се модели на авиони, главно торнада.
„Јас летам со Tornado 25 години“, изјави Шнајдер за DW. „Тоа е прекрасен, убав авион.“
Но, Tornado е исто така застарен авион. Посебно за една задача што му е наменета во германската армија. Имено, Бундесверот е обврзан да има авиони кои ќе можат да бидат вооружени со американско нуклеарно оружје во случај на вонредна состојба.
„Срцето ме боли“, вели Шнајдер за пензионирањето на својот сакан авион. „Но, сега добиваме авиони од петта генерација. F-35 е еден од најдобрите што ги имаме во НАТО. Ние сме горди и со нетрпение очекуваме да го добиеме“.
Германија инвестира милијарди евра во армијата. Од руската агресија врз Украина, никој во владејачките редови не зборува за Германија без атомско оружје - иако владејачките социјалдемократи, зелените и либералите го планираа тоа со коалициски договор кога ја формираа владата минатата година.
Едно истражување вели дека дури и Германците - претходно многу критични за атомските бомби - денес се мнозинство за чување на американските нуклеарни бомби од типот B61 во базата Бухел во западна Германија.
„Знаеме што треба да направиме. Нашата задача е нуклеарно одвраќање во склоп на НАТО. За ова трениравме повеќе од четириесет години. Подготвени сме“, рече Шнајдер, додавајќи дека се надева дека никогаш нема да мора да даде наредба за испалување атомско оружје.
Во моментов се реконструира воздушната база Бухел, се реновира пистата. Потребни се нови хангари за авионите F-35.
Тоа воопшто не ѝ се допаѓа на групата луѓе кои направија протестен камп пред базата. Вкупно има дванаесет мировни активисти кои од хартија прават цвеќиња и други симболи на мирот. „Да, ние сме малку“, вели Јоханес Олер (32) од Меѓународната кампања за укинување на атомското оружје. „Тоа е една од причините зошто се вклучив. Ми се чинеше дека само мал број луѓе се заинтересирани за оваа тема, иако е многу важна и заканувачки“, вели тој за DW.
Како успех на мировното движење, Олер го гледа фактот дека договорот за забрана на атомското оружје беше потпишан пред пет години (7 јуни 2017 година). Тој беше потпишан од 122 земји - ниту една нуклеарна сила - и ратификуван од 66 земји. Олер се залага Германија да пристапи кон договорот.
„Сè додека има атомско оружје, тоа значи дека во одреден момент ќе се користи“, вели активистот. „Мораме да го запреме“, вели тој, додека два авиона Tornado му поминуваат над глава.
Бухел, малиот град во кој се наоѓа базата, живее од присуството на војската. Пред киоск за брза храна со турски јадења, војниците трпеливо го чекаат својот ред за донер и помфрит.
„Тоа значи работа за луѓето што живеат таму и ни е драго што е така“, вели Вернер Гевенич (65), пензионер кој исто така чека ред. „Тоа со атомското оружје не ни пречи, живееме со него долги години. Ако дојде до нуклеарна војна, и онака сите сме готови, без разлика дали живееме покрај базата или подалеку од неа.“
Војниците си ја зедоа храната и продолжуваат понатаму. Попатно велат дека не ги интересираат активистите пред базата. Сè додека не го блокираат влезот, можат да демонстрираат колку сакаат.