Португалецот искажа убави зборови за Саудиска Арабија, земја каде сѐ уште е на сила смртната казна, а правата на жените се на многу ниско ниво.
Критиките нсекогаш се присутни, а повторно на мета се најде Кристијано Роналдо поради одлуката новата авантура да ја почне во Саудиска Арабија. Без разлика на изборот - повеќе или помалку сомнителен - португалскиот напаѓач беше жестоко критикуван за неговите зборови при официјалното претставување. „Многу клубови се обидоа да ме ангажираат, но јас му дадов збор на овој клуб да го развие не само фудбалот, туку и другите делови од оваа фантастична земја: сакам да дадам поинаква визија за овој клуб и оваа земја“.
Но, зборовите на напаѓачот предизвикаа реакција на Дана Ахмед, истражувач на Amnesty International за Блискиот Исток.
„Ангажирањето на Кристијано Роналдо од страна на Ал Наср е дел од стратегијата на Саудиска Арабија, многу е веројатно дека саудиските власти ќе го промовираат присуството на Роналдо во земјата како средство за одвлекување на вниманието од ужасната ситуација со правата на луѓето во земјата. Наместо некритички да ја фали Саудиска Арабија, Роналдо треба да го сврти вниманието кон прашањата за човековите права во земјата. Кристијано Роналдо не треба да дозволи неговата слава и статус на селебрити да станат алатка за масовно одвлекување на вниманието“, истакна Ахмед.