Франческо „Пеко“ Бањаја ја одбрани титулата во кралската класа. Возачот на Дукати победи на трката за Големата награда на Валенсија, а неговиот единствен конкурент, Хорхе Мартин на Прамак Дукати, не успеа да ја заврши трката. Шпанецот падна во шестиот круг по контактот со сонародникот Марк Маркес.
Шест круга траеше неизвесноста околу борбата за шампионската титула, во која Бањаја влезе со 21 бод повеќе од Мартин.
Актуелниот првак имаше добар старт, ја презеде челната позиција, а Мартин беше веднаш зад него.
Забележливо беше дека Мартин е агресивен и дека на секој начин се обидува да дојде до титулата. Имаа и близок контакт, Мартин го допре задниот дел од мотоциклот на Бања, но Италијанецот со многу мака ја задржа контролата. Мартин накратко излета од патеката, но потоа се врати на осмото место.
Марк Маркес, осумкратниот шампион, на неславен начин ја заврши успешната деценија во Репсол Хонда, во текот на која стана еден од најуспешните поединци во историјата на спортот. Од следната сезона ќе вози заедно со својот брат во Гресини Дукати. Маркес трката ја заврши заедно со Хорхе Мартин.
На девет круга до крајот, Џек Милер, кој тогаш беше на водечката позиција, имаше тежок пад. Така на Милер му пропадна шансата да стане првиот во историјата на Мото ГП шампионатот кој победил на три различни мотоцикли (Хонда, Дукати, КТМ).
На крајот Бањаја победи пред Фабио Ди Џанантонио на Гресини Дукати и Жоан Зарко на Прамак Дукати.
