Купувачите на BMW сè уште бараат рачни менувачи.
Рачните менувачи полека го отстапуваат местото на автоматиката. Тие се поудобни и побрзи за возачите, а денес се на такво ниво на развој што не ја зголемуваат потрошувачката на гориво.
CarBuzz беше на BMW M Festival на патеката Kyalami Grand Prix во Јужна Африка каде разговараше со шефот на одделот BMW M, Френк ван Мел. Едно од клучните прашања беше колку долго рачните менувачи ќе бидат достапни во моделите на BMW?
„За жал, рачниот менувач повеќе не е толку распространет. Поважен е во одредени сегменти, имено моделите М2 и М3, како и М4. Ние продолжуваме да нудиме рачни менувачи за тие автомобили и тие верзии ќе се продаваат до крајот на оваа деценија“, рече Ван Мел.
Тимо Реш, потпретседател за клиенти, бренд и продажба на BMW M, додаде дека компанијата ги следи активностите на клиентите кои петиционираат онлајн и гласаат, а најмногу бараат BMW да го задржи рачниот менувач.
Реш рече дека инженерите прашале зошто некому би му требал рачен менувач кога автоматиката е побрза, но тогаш одделот за маркетинг едноставно им рекол: фановите тоа го бараат.
Кај моделите М рачниот менувач сè уште „живее“, но кај другите поконвенционални модели сè повеќе отстапува на автоматиката.