Синузитис, риносинузитис или воспаление на синусите... како и да ја наречете оваа непријатна болест, на сите ни е добро позната, од лично искуство, но и ако сте родител (синузитис може да имаат и деца). Иако синузитисот поминува сам по себе, обично во рок од 2-3 недели (акутниот синузитис може да трае и до 12 недели), со соодветни лекови, овој непријатен период може да се направи поподнослив.
Синузитисот се развива кога има инфекција, оток и воспаление на мукозата на синусите. Најчесто е предизвикан од вируси, а во мал број случаи од бактерии, додека габите се ретка причина. Други состојби како што се алергии, назални полипи и забни инфекции, исто така, можат да придонесат за болка во синусите и други симптоми на воспаление. Иако синузитисот може да се појави во секое време од годината, тој е најчест во сезоната на настинки и грип, односно во есен и зима.
Најчестите симптоми по кои можете да препознаете дека имате синузитис, а оние кои се склони кон него веројатно веќе добро ги знаат, се болка и притисок во пределот околу очите и носот, главоболка, затнат нос со придружно белузлаво или жолто-зелен секрет кој може да предизвика болки во грлото, кашлица и засипнатост, како и треска. Карактеристично е и тоа што секретот тече назад, низ задниот ѕид на фаринксот, а често се присутни замор и исцрпеност, како и болка во увото. Типично е и дишењето преку уста и зборувањето низ нос, додека намаленото чувство за мирис и лош здив се поретки. Главоболката е посилна наутро, бидејќи во текот на ноќта секретот се наталожува во синусите.
Ова е прашање што се наметнува кај сите нас во услови на пандемија, кога секое 'рчење или стискање во грлото изгледа сомнително и нѐ тера да се запрашаме дали сме заразени со коронавирусот. Во овој случај, прашањето е навистина оправдано затоа што некои од симптомите на овие две болести се преклопуваат, а двете болести се јавуваат почесто во услови кога повеќе време поминуваме во затворен простор, како што е случајот во зимските месеци. Иако и синузитисот и COVID-19 можат да предизвикаат треска, главоболка, воспалено грло и назална конгестија, постојат некои разлики меѓу нив.
Синузитисот предизвикува поголема непријатност, притисок и болка во лицето и челото, изразена назална конгестија, а карактеристичниот обоен секрет истекува од носот или пак паѓа низ грлото. Во секој случај, болката или притисокот во синусите (околу очите или на целото лице) и секретот што тече низ грлото се прилично добри показатели дека всушност може да се работи за синузитис бидејќи тоа не се типични симптоми на COVID-19.
Од друга страна, COVID-19 предизвикува повеќе сува и иритирачка кашлица, губење на чувството за вкус и мирис и во повеќето случаи повеќе симптоми на долниот респираторен систем, како што се отежнато дишење, притисок и болка во градите, кратко дишење и слично. Исто така, симптомите кои се поспецифични за COVID-19 и ретко се јавуваат со инфекции на синусите се болки во телото, тегоби како гадење, повраќање или дијареа со губење на чувството за вкус и мирис.
