Обраќајќи му се на италијанскиот колега Сандро Гоци, бугарскиот европратеник Ангел Џамбазки среде Европскиот парламент го направи нацистичкиот поздрав, заштитен знак на Адолф Хитлер и Бенито Мусолини.
Џамбазки, инаку познат антимакедонист, негатор на македонскиот народ и поборник за кршење на човековите права на македонското малцинство во соседна Бугарија, од синоќа е мета на лавина критики од европската јавност поради неговиот испад со нацистичкиот поздрав.
Колегите на Гоци, кој беше мета на испадот на Џамбазки, застанаа на страната на Италијанецот обвинувајќи го Бугаринот за нацизам и побараа да биде санкциониран.
„Го навреди Сандро Гоци. Потоа ја напушти салата на овој начин. Тоа е Ангел Џамбазки, европратеник од бугарското националистичко движење. Погледнете го, погледнете го сите и пресудете сами. За мене има само еден збор: срамота. Поддршка за Сандро“, од Никола Данти, потпретседател на Renew Europe.
„Да се навреди колега и да се изгнаси Европскиот парламент со нацистички поздрав е недостоен чин кој не може да се толерира. Силна осуда за бугарскиот пратеник Џамбазки и солидарност за мојот пријател Сандро Гоци. Мора што поскоро да се преземат мерки“, напиша италијанската европратеничка Рафаела Паита.
„Нацистички поздрав среде Европскиот парламент. Скандалозна агресија врз демократијата. Предупредување за непречен пораст на насилната екстремна десница. Закана за сите нас“, порача францускиот европратеник Стефан Бижу.