Со победа над градскиот ривал Еспањол како нов тренер на Барселона дебитираше синоќа Чави Ернандес, едниот од најуспешните играчи на каталонскиот клуб во последните неколку децении.
Барселона победи со 1:0 во рамки на 13 коло во Ла Лига и со пет победи, пет нерешени и три порази сега е шестопласирана на табелата.
– Беше важно да победиме и сосема заслужено ги освоиме трите бодови. Но, има многу работи кои мора да ги поправиме во иднина. Пред нас е голема и тешка работа, изјави 41-годишниот Чави, кој го носеше дресот на Барселона од 1998 до 2015 година.
– Прекрасно беше повторно да се излезе на Камп Ноу. Се вратив тука по шест години и атмосферата беше прекрасна. Можеби малку поинаква од времето кога играв, но, сепак, беше повторно фантастична, вели Чави.
