Неверојатна приказна ни доаѓа од Светските универзитетски игри во Кина каде вниманието на светските медиуми го привлече анонимна сомалиска спринтерка.
Имено, на трката во 100 метри во женска конкуренција на патеката во Ченду се појави и Насра Абукар Али од Сомалија. Уште на стартот на трката на видеата станува јасно дека не се работи за тренирана атлетичарка, а судејќи по конституцијата на телото, дефинитивно не е ниту спринтерка.
Откако Насра истрча со „неверојатно“ време од 21,81 секунда, речиси 10 секунди побавно од останатите, многумина се запрашаа како таа воопшто се нашла во трката на 100 метри.
Некои извори велат дека станува збор за внука на потпретседателката на Сомалиската атлетска федерација, Хадиџо Аден Дахир, која по овој скандал е суспендирана од функцијата. За нејзината суспензија јавно објави Министерството за млади и спорт на земјата.
Во јавноста излезе и извинување од министерот за спорт на Сомалија, Мохамед Баре Мохамуд, кој истакна дека не знае како 20-годишната Насра била избрана да ја претставува Сомалија во трката на 100 метри, а отиде и чекор понапред изјавувајќи дека настапот на оваа млада „атлетичарка“ е срам за целата нација.
Министерката Дахир дури и јавно ѝ честитала на Насра за тоа што влегла во репрезентацијата на Сомалија за Игрите во Кина.
Светските универзитетски игри на ФИСУ се наменети за студенти-атлетичари и се организираат на секои две години.
