Нови детали за последните денови од животот на кралот на поп музиката, Мајкл Џексон, и натаму се појавуваат, и 14 години по неговата смрт.
Документарецот со име „Killing Michael Jackson“ го режираше и продуцираше компанијата ZigZag, а откриените детали станаа вирални на социјалните мрежи. Овој документарец содржи сведочења на тројца детективи што учествувале во истрагата за смртта на славниот пејач, а откри интригантни аспекти од обдукцијата на неговото тело.
Меѓу откриените детали се наведува дека Џексон бил ќелав и дека носел перика за тоа да го прикрие. Од страна на главата имал и тетоважа за камуфлирање на ќелавоста. Воедно, биле воочени лузни на ушите, носот, вратот, зглобовите на рацете и на самите раце. Се верува дека лузните биле последица на козметичките операции на кои подлегнувал за време на својот живот во намера да си го промени изгледот.
Мајкл Џексон изненадно почина на 51-годишна возраст на 25 јуни 2009 година, а како причина за смртта наведен е срцев застој како последица од предозирање со седативите што редовно ги употребувал.