И тоа се случува на терените ширум Македонија: судија свирна пенал откако невидлива сила, претпоставуваме дух, го собори домашниот играч во казнениот простор.
Синоќа се играа натпреварите од 6. коло во двете второлигашки групи, а неверојатна снимка ни доаѓа од Виница. Таму, на стадинот „Филип II“ домашната екипа на Слога 1934 го пречека фаворитот Тиквеш и загуби со 1:3, но прва поведе.
Имено, во 23. минута домашниот играч Иван Митров беше во пробив во гостинскиот шестнаесетник кога играчот кој го пратеше, Ристе Илијовски се сопна и падна. Митров го искористи тоа и без никаков контакт, како некој дух да го соборил, се фрли во казнениот простор, а судијата Петар Мантев од Неготино и неговиот помошник наседнаа на измамата и покажа на белата точка.
Александар Пановски успешно го совлада Стојан Димовски од пенал, но бадијала бидејќи Тиквеш потоа постигна три гола и со пресврт дојде до победата.
Сепак, досудениот пенал долго ќе стои како потсетник на квалитетот на судиите во македонскиот фудбал.