Facebook соопшти дека растури мала мрежа на профили и страници кои биле дел од руска кампања за вршење влијание во странство.
Компанијата соопшти дека онлајн кампањата била поврзана со руската Агенција за интернет истражување (Internet Research Agency - IRA), организација блиска до руската Влада која се сомничи за мешање во претседателските избори во САД во 2016 година.
Twitter исто така суспендирала пет профили од истата мрежа.
Операцијата била насочена на PeaceData, која тврди дека е непрофитен информативен вебсајт на англиски и арапски јазик.
И Facebook и Twitter соопштија дека онлајн кампањата постигнала многу ограничен успех. Едната укината страница имала околу 14.000 следбеници, а друга едвај 200. Нивното дејство било прекинато пред да почнат да остваруваат релевантно влијание. Страниците биле водени од лажни профили, а на вебсајтот „пишувале“ непостоечки „фриленс автори“.
Веста следи само два месеца пред претседателските избори во САД на кои ќе се соочат актуелниот претседател Доналд Трамп и демократскиот кандидат Џо Бајден.
Операцијата била спроведена во соработка со работната група Foreign Influence Task Force на ФБИ.
Facebook соопшти дека укинала 13 профили и две страници кои „вршеле влијание врз јавната дебата во САД“ и други земји, како Велика Британија и Египет.