Поранешниот дефанзивец на „Црвените ѓаволи“ јавно побара од Ерлинг Браут Холанд да дојде во Манчестер Јунајтед и да го врати клубот на победничките патеки.
Рио Фердинанд е една од легендите на Манчестер Јунајтед. Тој 12 сезони настапуваше за клубот, од 2002 до 2014 година. Беше дел од златната ера на Сер Алекс Фергусон, ера за која клубот сѐ уште сонува и од која е далеку. Но, Фердинанд верува дека еден напаѓач може да му ја врати славата на клубот, а тоа е норвешкиот бисер од Борусија од Дортмунд, Ерлинг Браут Холанд.
„Не сакам да зборувам за играчи од други клубови, но овој дечко, човече, не смееме да си дозволиме да замине во некој друг клуб“, вели Рио во својата емисија на YouTube.
„Неговата единствена дестинација е Англија, тоа е единственото место каде мора да оди. Ако замине некаде на друго место ќе бидам навистина изненаден“, додава.
Интересно, Холанд е роден во Лидс, Англија, бидејќи татко му Алф-Инге тогаш настапуваше за Лидс Јунајтед. Но, истата година семејството Холанд се пресели во Манчестер бидејќи таткото потпиша за Манчестер Сити.
„Роден овде и растен овде. Нормално, тој го обожава англискиот фудбал, татко му играше овде. Сигурен сум дека дека еден од неговите соништа е да дојде и да игра во Англија“.
Фердинанд и директно му се обрати на магичниот Норвежанец.
„Зошто не во црвениот дрес на 'Олд Трафорд'? Биди човекот кој ќе му ги врати пехарите на Манчестер Јунајтед и да го врати времето на успеси. Биди тој човек“, рече Рио.
Нормално, за 20-годишен феномен како Холанд заинтересирани се најдобрите и најбогатите клубови на светот. Барселона и Реал Мадрид се интересираат за сите ѕверки, ПСЖ го сака во случај да си замине Килјан Мбапе, на листата се и Манчестер Сити и Челси, како и Баерн кој е редовен купец на најдоброто од Борусија.