Португалецот не можеше да му помогне на Манчестер Јунајтед да остане непоразен синоќа во Истанбул, а смета дека ништо не му одело како што треба на неговиот тим.
„Сѐ одеше во погрешен правец, сѐ што правевме беше погрешно. Можеме многу подобро од ова, сите го чувствуваат тоа“, вели Бруну Фернандеш за синоќешниот пораз од 2:1 на гости кај Башакшехир.
Јунајтед иако доминираше, само два пати успеа да шутне во рамките на домашниот гол, од кои едниот пат топката заврши во мрежата.
Затоа, пак, два гола прими од контра напади, а особено критики навлече оној вториот кога одбраната не реагираше како што треба.
„Јасно ни е дека не смее да примаме голови на таков начин, но сега треба да анализираме зошто грешевме и да се потрудиме да се подобриме уште во наредниот натпревар“, смета португалскиот пеналџија.
„Црвените ѓаволи“ до неделата беа во одлична форма со 4 натпревари без пораз (3 победи и реми), но прво загубија дома од Арсенал 0:1, а вчера и во Лигата на шампионите од Башакшехир.
„Да погледнеме: пред една недела сите зборуваа за тоа колку добро ни оди, дека одлично играме. Победивме против Њукасл, против ПСЖ, го поразивме Лајпциг. Одигравме нерешено со Челси во натпревар кој можевме и да го добиеме. Овој натпревар беше важен за нас, да се победи за да бидеме мирни на табелата“, заврши тој.
