Управното тело на светскиот фудбал (ФИФА) објави список од 12 играчи кои се во конкуренција за наградата за најдобар фудбалер во светот.
Наградата The Best FIFA е втора најмоќна во светот на фудбалот, а иако не се официјални награди на ФИФА, Златната топка (или Ballon d'Or) што ја доделува France Football се смета за највисока награда.
Во конкуренција на 12 играчи кои ќе се борат за најдобар играч на ФИФА, има дури шестмина од шампионскиот Манчестер Сити од минатата сезона, тимот кој ја освои тројната круна, вклучувајќи го домашното првенство на Премиер лигата, ФА купот и Лигата шампионите на УЕФА.
Меѓу нив се Холанд, Де Брујне, Ѓундоан (кој летово си замина од Сити во Барселона), Бернарду Силва, Родри и Алварес.
- Хулиан Алварес (Аргентина)
- Марцело Брозовиќ (Хрватска)
- Кевин Де Брујне (Белгија)
- Илкај Ѓундоан (Германија)
- Ерлинг Холанд (Норвешка)
- Родриго Ернандес Касканте (Шпанија)
- Хвича Кварацхелиа (Грузија)
- Килјан Мбапе (Франција)
- Лионел Меси (Аргентина)
- Виктор Осимхен (Нигерија)
- Деклан Рајс (Англија)
- Бернарду Силва (Португалија)
На списокот е и Лионел Меси, кој летово ја напушти Европа и кариерата ја продолжи во МЛС. Од финалистот во Лигата на шампионите номиниран е единствено Марцело Брозовиќ, кој летово се презели во Саудиска Арабија (Ал Наср).
Во изборот за најдобар тренер во светот се најдоа Пеп Гуардиола (Манчестер Сити), кој сигурно ќе ја освои оваа награда, Симоне Инѕаги (Интер), Енџ Постекоглу (Селтик, сега во Тотенхем), Лучано Спалети (Наполи, сега селектор на Италија) и Чави Ернандес (Барселона).
За најдобар голман номинирани се Јасин Боно (Севиља, сега Ал Хилал), Тибо Куртоа (Реал Мадрид), Едерсон (Манчестер Сити), Андре Онана (Интер, сега Манчестер Јунајтед) и Марк-Андре тер Штеген (Барселона).
Наградата се доделува за прикажаното во периодот од 19 декември 2022 до 20 август 2023 година. Гласањето ќе се одржи онлајн на FIFA.com и ќе заврши во петок на 6 октомври на полноќ.
Минатата година оваа награда ја освоија Лионел Меси во машка категорија, а Алексиа Путељас во женска. Емилиано Мартинес беше најдобар голман, а Лионел Скалони најдобар тренер.
