Компанијата Sports Interactive во 2021 година вети дека во игрицата „Football Manager“ ќе воведе и женски фудбалски тимови, а сега e познато и кога оваа новина ќе се оствари.
Во објава на својот блог Sports Interactive официјално потврди дека женските тимови ќе бидат дел од игрицата „Football Manager 2025“, која на пазарот ќе се појави наредната година.
Познатото гејминг студио претходно истакна дека ќе му треба време за воведување на женските тимови во игрицата бидејќи целта е да понуди исто ниво на длабочина како што е случај со машките тимови. „Football Manager“ има огромна база на податоци која располага со илјадници играчи од кои секој има своја индивидуална статистика, биографија, историја на повреди и слично. И не само тоа, Sports Interactive мораше да ги земе предвид и промените во системот на атрибути, водејќи сметка за родовите, како и различните лигашки правила, кога станува збор за женскиот фудбал.
Покрај воведувањето на женски тимови, „Football Manager“ носи и уште една голема промена, а тоа е префрлувањето на енџинот за играње Unity, кој ќе „понуди поголема графичка моќност во сите формати, со моќни алатки на корисничкиот интерфејс“. Интерфејсот исто така ќе биде потполно нов со значително подобро искуство во натпреварите. Се очекува и „голем скок напред“ кога станува збор за анимацијата. Сепак, транзицијата на Unity, кога станува збор за мобилната верзија, ќе трае нешто подолго.
На проектот за ремонт на основната технологија на „Football Manager“ се работи веќе неколку години. Првичната цел беше да се обнови серијата почнувајќи со „Football Manager 2022“, но пандемијата со коронавирусот го примора студиото да направи чекор назад и да се осигура дека секоја година ќе може да ја пласира новата верзија.
„Football Manager“ ја надмина границата од 5 милиони играчи, што е најмногу во историјата на игрицата, а откако се воведени верзиите за Apple Arcade и PlayStation 5.
