Поранешниот играч од средниот ред на Челси доби признание за својата 20-годишна одлична кариера во англискиот фудбал.
Френк Лампард е петтиот член на Куќата на славните во Премиер лигата откако во јавно гласање беше изгласан да им се придружи на претходно избраните Алан Шишер, Тјери Анри, Ерик Кантона и Рој Кин.
Англиската легенда својата премиерлигашка кариера ја почна на 17-годишна возраст дебитирајќи на 31 јануари 1996 против Ковентри Сити, нормално, како замена тогаш. Во Вест Хем остана заклучно со сезоната 2000/01 кога се пресели во Челси.
На „Стемфорд Бриџ“ мина 13 сезони, а потоа една сезона одигра за Манчестер Сити пред да се пресели преку барата во МЛС. Таму одигра две сезони за Њујорк Сити пред конечно во 2016 да замине во пензија. Сѐ на сѐ одигра 609 натпревари во Премиер лигата и постигна 177 голови.
Беше и стандарден репрезентативец на Англија за која одигра 106 натпревари и постигна 29 голови и беше дел од ЕУРО 2004 и Мундијалите 2006, 2010 и 2014.
Со Челси 3 пати ја освои Премиер лигата, 4 пати ФА купот, по 2 пати Лига купот и Суперкупот, и по еднаш Лигата на шампиони и Лига Европа. Претходно со Вест Хем триумфираше во поранешниот Интертото куп.
На индивидуално ниво, беше прогласен за играч на сезоната во Премиер лигата за сезоната 2004/05, најдобар асистент во сезоните 2004/05, 2008/09 и 2009/10, УЕФА најдобар играч од средниот ред во 2008, англиски фудбалер на годината 2004 и 2005, како и многу други награди.
Две години по џавршувањето на кариерата почна тренерска авантура во Дерби Каунти, а во јули 2019 седна на столчето на својот Челси од каде беше отпуштен во јануари 2021 годинава.
