Тренерот на Наполи е бесен за вчерашното исклучување на Лоренцо Инсиње кој настрада само поради пцовка, а неговиот тим мораше да игра со играч помалку на гости кај Интер.
Се играше без голови синоќа во Милано сѐ до 71. минута кога голманот Давид Оспина го фаулираше Mатео Дармјан при една шанса за гол и главниот судија Давиде Маса покажа на белата точка.
На таа одлука негодуваа фудбалерите на Наполи, а најлут беше Лоренцо Инсиње кој му се обрати со зборовите „Vai a cagare“, што на македонски би соодветствувало со „Иди у пм“, додека буквалниот превод е „Иди ис*ри се“. За тие зборови доби директен црвен картон. Ромелу Лукаку го реализираше пеналот, а токму тој гол му ја донесе победата на Интер.
„Му рече: 'Иди у пм'. Само во Италија судиите те исклучуваат бидејќи си ги пратил у пм. Во Англија цело време велат 'fuck off' и никој ништо не ти прави. Само во Италија судијата го исклучува капитенот на Наполи бидејќи го пратил у пм заради сомнителен пенал. Само во Италија, е вака се менуваат натпреварите. Тој лесно си го извади картонот, а потоа ние моравме да му ја мислиме“, бесен е Џенаро Гатузо.
„Во мое време да беше вака јас еден натпревар ќе играв, потоа на наредниот немаше да играм“. Популарниот Рино како играч важеше за жесток на теренот, но и без влакна на јазикот, па споредбата негова навистина држи вода. Во негово време да исклучуваа играчи само заради пцовки, тој ќе беше рекордер по бројот на црвени картони.
„Беше и тоа како тактички натпревар. Наполи одигра одлично, се обидовме да направиме нешто ново. Ние повеќе ја заслуживме победата откоку тие, но тоа е тоа бидејќи треба да постигнеш гол. Сега треба да милсиме на натпреварот со Лацио викендов“, заврши Гатузо.
