Барселона синоќа одигра 2:2 со Атлетико Мадрид и по саботното реми на гости кај Селта, направи нов чекор назад во однос на лидерот Реал Мадрид.
„Штета. Цело време ни станува сѐ потешко и потешко. Се оддалечуваме од титулата, но мора да продолжиме да работиме“, рече Кике Сетјен по натпреварот.
Сетјен беше соочен и со прашања за Антоан Гризман. Шефот на стручниот штаб на Барса има сѐ помалку пријатели во клубот, а сега сите сакаат да знаат зошто на мечот против Атлетико Мадрид при резултат од 2:2 реши да го внесе во игра Французинот дури во 90-та минута.
Секако, кон сево ова придонесува и фактот дека Гризман е едно од најскапите засилувања во историјата на Барселона – минатото лето беше платен неверојатни 120 милиони евра.
„Не може сите да играат“, почна Сетјен на прашањето за Французинот, а потоа сите ги изненади со понатамошниот одговор.
„Тешко е да го ставите Гризман во игра, а да не ја дестабилизирате екипата. Можеби не е логично да го внесете во 90-та минута, но со таков играч секогаш мислите дека тој може нешто да направи.“
Се поставува прашањето зошто Барса издвои 120 милиони евра за играч кој го дестабилизира тимот кога е на терен, а Сетјен инсистира дека Гризман уште е важен.
„Само околностите ме присилија да го ставам на клупа. Знам дека на Гризман му е тешко и ќе разговарам со него на следниот тренинг, ама нема да му се извинам. Јасно ми е дека можеби се чувствува лошо, ама и јас се чувствувам лошо бидејќи Антоан е одличен фудбалер и одлична личност“, заклучи Сетјен, отворајќи уште многу дилеми со ваквиот одговор.
