Новак Ѓоковиќ во полуфиналето на Австралија опен загуби од освојувачот на турнирот, Италијанецот Јаник Синер, а поотоа гостуваше во емисијата „Today Show“ на австралискиот Channel 9, каде кажа неколку работи од неговото детство.
Српскиот тенисер уште еднаш се потсети на растењето и условите во кои ја започнал кариерата.
„Поминавме низ две војни, ембарго од 1992 до 1996 година, кога ниту еден српски спортист не можеше да се натпреварува на меѓународни натпревари. Тоа беа тешки времиња, но тоа ме зацврсти. Можев лесно да тргнам по друг пат, но мислам дека мојата судбина беше да играм тенис и да постигнам големи резултати“, изјави Ѓоковиќ.
Тој истакна како на него силно влијаело бомбардирањето на Србија од страна на НАТО во 1999 година.
„Имав 12 години кога бомбардирањето траеше два и пол месеци без престан. Понекогаш се сеќавам на тоа, најмногу кога слушам огномет бидејќи ме потсетува на експлозии на бомби. Не е пријатно, веројатно е траума. Мислам дека тоа е поврзано и со тоа што не се откажувам“, изјави Ѓоковиќ и продолжи:
„Во Србија има една изрека: можете да ни го убиете телото, но не можете да ни ја убиете душата. јас верувам во тоа. Погледнете колку тенисери во историјата го постигнале тоа што јас го постигнав? Ова не го кажувам за да се пофалам, туку само сакам да се сетам и да разберам што постигнав“, заклучи тој.