Поранешниот фудбалер на Интер бил уапсен во својата родна земја по пријава за семејно насилство.
Фреди Гуарин сега има 34 години и игра за тимот на Миљонариос во родната Колумбија. Порано беше ѕвезда на Порто, играше 4 години за Интер, го бараа Јувентус и Манчестер Јунајтед, па заврши во Кина.
Сега се најде во фокусот на јавноста поради шокантно видео од негово апсење. Колумбиската полиција интервенирала откако добила повик од неговите родители дека во куќата на Гуарин во тек е семејно насилство.
Како што се гледа од видеото, полицаец го вади Гуарин од куќата, кој е измачкан со крв. Нејасно е дали крвта е негова или на некој член на неговото семејство.
„Добивме повик за семејно насилство. По пристигнувањето на локацијата, начекавме семејна расправија пред влезот, каде синот беше во судир со своите родители. Реагиравме професионално, родителите бараа помош таа личност да биде тргната од нив, што и го направивме“, опишува Хорхе Луис Варгас, директор на Градската полиција Ваље дел Абура.
Гуарин од 2006 до 2015 настапуваше и за репрезентацијата на својата земја бележејќи 57 настапи со 4 голови, а настапи на Мундијалот 2014 во Бразил.
