Легендарниот колумбиски голман својата грешка од фудбалските терени ја употреби за да апелира до граѓаните да ги почитуваат мерките за заштита од коронавирусот.
Рене Игита е одамна во пензија. Но, дури и оние генерации родени по неговото време во знаат кој е благодарение на неговите настапи за репрезентацијата на Колумбија за која бранеше на Мундијалот 1990 во Италија.
Токму во Италија лудориите на Игита дојдоа до израз, но она што го направи во осминафиналето ја чинеше Колумбија елиминација. Се играше второто продолжение од двапати по 15 минути, Камерун водеше 1:0 кога Игита реши со топката да излезе надвор од шестнаесетникот и да го дрибла Роже Мила. Камерунецот му ја зема топката и постигна гол за 2:0. Камерун победи со 2:1, а Колумбијците ги спакуваа куферите. Претходно во групната фаза успешно успеа да го издрибла нашиот Дарко Панчев кога Колумбија играше против Југославија.
Оваа грешка денес Игита ја искористи како апел до неговите сограѓани да останат дома и да помогнат во спречувањето на вирусот.
„Денес ми ја пратија оваа фотка... да, оваа фотка служи за ОСВЕСТУВАЊЕ и јас ќе ја искористам... на прво место е здравјето, ако можеш да бркаш работа од дома тогаш не излегувај“, твитна Игита, а на сликата додаде „Кога ти велат да не излегуваш, не излегуваш!“.
И него на времето му велеа да не излегува од својот голмански простор, ама не слушаше. После тој натпревар и тоа како се каеше и изјави дека таа авантура била „грешка голема како куќа“. Тогаш го доби и прекарот „Лудиот“ (El Loco).
Но, Игита е единствен и неговиот карактер тешко се менува. Пет години подоцна на пријателска против Англија на „Вембли“ ја изведе веројатно најатрактивната голманска одбрана на сите времиња. Хари Реднап проба да го лобува, а овој смирено, со одбрана позната како скорпија, му го понижи обидот. Тогаш среќата го посака, но ризикот сепак го направи.
