Возбудливиот натпревар синоќа на „Камп Ноу“ помеѓу Барселона и Интер заврши 3:3, што значи дека сега Барса ќе мора да чека кикс на Интер за да избори пласман во осминафиналето.
Веројатно никој не очекуваше 6 гола синоќа на дуелот помеѓу истите екипи кои една недела претходно одиграа само 1:0 во Милано, кога победи Интер. Но, каталонскиот тим и гостите од калчото на гледачите им приредија ретко видено шоу и на крајот ги поделија бодовите иако и двата тима постигнаа по три гола.
Нормално, позадоволен беше предводникот на Интер, Симоне Инѕаги, отколку неговиот колега Чави Ернандес. Причината е проста: само победа ја враќаше Барса во игра за едно од првите две места кои водат во нокаут-фазата.
„Знаевме дека имаме храброст и уште во првото полувреме создадовме доволно шанси. На паузата на играчите им реков да веруваат во себе“, рече стратегот на Интер по натпреварот.
„Да победевме ќе си го заверевме пласманот две кола порано, но сега ја имаме Викторија. Проблемот на Барса е што налетаа на Интер. Сега ќе нѐ паметат во Шпанија“, додаде. Интер сега има 7 бода и е втор, додека Барса има 4. До крајот и двата тима играат по еднаш со Баерн и со чешка Викторија, но наредното коло Интер ја има полесната задача бидејќи во Милано ги пречекува Чесите, а со победа ќе си го завери пласманот на сметка на Барса.
Новинарите го прашаа Инѕаги дали ова беше негова одмазда поради начинот на кој во Шпанија се зборуваше за него.
„Одмазда против кого? Оние во Шпанија кои ме нарекуваат тренер за катанаџо. Играта на моите момци говори сама за себе, не морам да се одмаздувам. Барселона во Ла Лига има едно реми, а сега долго време ќе нѐ памти“, заврши интеровиот тренер.
