Откако е откриено дека истекува кислород од Меѓународната вселенска станица (ISS) повеќе од вообичаено, екипажот ќе ја напушти и викендот ќе го мине во рускиот модул.
Американската вселенска агенција откри истекување на кислород, иако не постои опасност по Станицата и по екипажот, сепак мора да се извршат поправки. Во текот на викендот сегменти од ISS ќе бидат изолирани со затворен поклопец, а екипажот привремено ќе премине во рускиот модул.
„Тестот би требало да покаже кој модул од Станицата испушта кислород повеќе од нормалното. Американските и руските специјалисти очекуваат прелиминарни резултати кон крајот на следната недела“, соопштија од НАСА.
Руската вселенска агенција Роскосмос потврди дека дојде до дефект и ја уверува јавноста дека нема опасност по екипажот. Руските медиуми пишуваат дека дефектот е во американските модули.
Претходниот проблем со истекување кислород се случи во 2018 година, кога беше откриена дупка во руското летало Сојуз. Причината за тоа оштетување сè уште е мистерија, пишува Russia Today.