Фудбалерите на Баерн продолжија да доживуваат вистинска агонија и против Бохум го врзаа третиот пораз за само осум дена, а тоа беше клучната тема на состанок кој синоќа траел до доцна во ноќта.
Со поразот 3:2 на гости кај Бохум гигантот од Минхен ги намали на минимум шансите за освојување на титулата во Бундеслигата, бидејќи Баер Леверкузен сега има 8 бода предност на врвот на табелата. Покрај тоа, тимот остана и без ДФБ купот и германскиот Суперкуп, но тренерот Томас Тухел се уште е на клупата.
По поразот од Бохум синоќа беше свикан итен состанок кај баварскиот гигант кој траеше речиси до полноќ. Иако се очекуваше отказ за Тухел, кој е на удар на јавноста во Германија и навивачите на Баерн, тоа сепак не се случи.
Напротив, раководството на Баерн реши да му даде нова шанса на Тухел и да продолжи со него како ништо да не се случило. Најверојатно по оваа одлука незадоволството на навивачите ќе биде уште поголемо.
„Чувствувам поддршка. Знам каков однос имам со извршниот директор Јан-Кристијан Дрисен и како соработуваме. Тој знае колку оваа ситуација ме нервира и колку труд вложуваме“, изјави Тухел по новиот пораз.
Целата сезона на Баерн е загрозена за само една недела. По поразот во дербито од Леверкузен следуваше пораз во Лигата на шампионите од Лацио во првиот осминафинален натпревар, а синоќа „Баварците“ загубија и од Бохум во Бундеслигата, тим кој до синоќа имаше само 4 победи.
Баерн синоќа на „Воновиа Рур“ стадионот поведе во 14. минута преку Џамал Мусиала, но Бохум со пресврт преку Такума Асано во 38. и Кевен Шлотербек во 44. минута замина на пауза со водство од 2:1. Потоа во 77. минута Баерн остана со десетмина откако Дајот Упамекано направи пенал поради удар со лакт, а Австриецот Кевин Штогер го реализираше за 3:1. На три минути до крајот Хари Кејн намали на 3:2, но баварската гордост потоа не успеа да постигне трет гол за реми.
За Упамекано ова е второ исклучување во последните два натпревара откако и против Лацио во средата направи пенал и доби директен црвен.