Претседателот на Италијанската фудбалска федерација јасно стави дознаење дека Јувентус ќе биде исфрлен од Серија А доколку се реализира идејата за Суперлигата.
Претседателот на „Старата дама“, Андреа Ањели, е еден од главните поборници за реализација на контроверзниот проект наречен Суперлига, чија главна цел не е компетитивност туку добивање финансиски средства на и онака веќе богатите европски клубови.
Габриеле Гравина, кој е претседател на ФИГЦ под чија капа е и Серија А, категорично стави до знаење дека судбината на Јуве во Калчото ќе биде запечатена доколку се одлучи да учествува во Суперлигата.
„Тоа е сега хипотеза, но Јувентус ќе биде исклучен од Серија А доколку се реализира таквата лига. Суперлигата е погрешен одговор на вистинскиот проблем. Италија мора да размисли како лигата да ја направи поатрактивна за странските пазари како арапксиот, од каде што во моментов немаме ќар“, рече тој за весникот La Repubblica.
Претходно Интер и Милан се откажаа од идејата за Суперлигата, оставајќи го Јувентус единствен италијански клуб заедно со шпанските гиганти Реал Мадрид и Барселона. Претходно се откажаа и останатите клубови, па од вкупно 12 сега проектот го туркаат само 3.