Нова болест предизвикана од пластика е откриена кај морските птици, а животните идентификувани со болеста, наречена пластикоза, имале лузни во дигестивниот систем од проголтан пластичен отпад, објавија научниците од Природонаучниот музеј во Лондон.
Тоа е прв регистриран случај на фиброза предизвикана од пластика кај диви животни, велат научниците, а пренесува британски Guardian.
Загадувањето со пластика станува толку широко распространето што се пронајдени лузни кај различни возрасни групи на птици, според студијата објавена во Journal of Hazardous Materials.
Откриено е дека и младите птици ја имаат оваа болест, а се верува дека ја добиле кога родителите ги хранеле со храна загадена со пластика.
Парчињата пластика предизвикуваат воспаление и лузни на органите
Научниците, вклучувајќи ги и Алекс Бонд и Џенифер Лејверс од Природонаучниот музеј, го проучувале живеалиштето на птиците на островот Лорд Хау во Австралија за да ја утврдат врската помеѓу проголтаната пластика и почетниот дел од стомакот на птицата. Откриле дека колку повеќе пластика внесува птицата, толку повеќе има лузни.
Болеста може да доведе до постепено влошување на жлездите во тој дел од дигестивниот тракт.
Губењето на овие жлезди може да предизвика птиците да станат отпорни на инфекции и паразити и може да влијае на нивната способност да ја варат храната и да апсорбираат некои витамини.
Научниците ја нарекоа оваа болест пластикоза за да биде јасно дека е предизвикана од пластика во околината.
Откриено е дека кога птиците внесуваат мали парчиња пластика, тоа предизвикува воспаление на дигестивниот тракт. Со текот на времето, воспалението предизвикува лузни на ткивото кои влијаат на варењето, растот и преживувањето.
Природните материјали пронајдени во стомакот на птиците, како што се камчињата, не ги предизвикувале истите проблеми, што ги натерало научниците да ја означат болеста како состојба конкретно предизвикана од пластика.
Можеби изгледаат здраво однадвор, но не се однатре
Бонд, главен кустос за птици во Природонаучниот музеј, рече: „Иако овие птици може да изгледаат здрави однадвор, не се однатре. Студијата е прва што го разгледува стомачното ткиво на овој начин и покажува дека конзумирањето пластика може да предизвика сериозни оштетувања на дигестивниот систем на овие птици“.
Иако научниците проучувале само еден вид птица во еден дел од светот, тие веруваат дека се погодени повеќе видови и велат дека се потребни повеќе истражувања за да се открие колку е распространета пластикозата.
Тие велат дека изложеноста на сите организми на пластика е неизбежна, бидејќи емисиите на пластика се зголемуваат, а пластичното загадување преовладува во сите средини на глобално ниво.
