Европската комисија подготвува терен за ретроактивно царинење на кинеските електрични возила, бидејќи увозниците од утре ќе треба да пријават увоз, а летово би можело да се воведат царини.
Во октомври, Комисијата започна истрага за увоз на кинески електрични возила со батерии за да утврди дали треба да се воведат тарифи за да се заштитат домашните производители од нелојална странска конкуренција.
Брисел мора да ја заврши истрагата до ноември, но би можел да воведе привремени царини веќе во јули.
Во документот објавен вчера, Комисијата соопшти дека има доволно докази за да покаже дека кинеските електрични возила се субвенционирани и дека нивниот увоз е зголемен за 14 отсто од почетокот на истрагата во октомври во споредба со истиот период минатата година.
Во документот се наведува дека производителите на ЕУ би можеле да претрпат непоправлива штета доколку увозот на кинески возила продолжи да расте со такво темпо додека не заврши истрагата.
Кинеската стопанска комора при ЕУ соопшти дека се разочарани од овој потег, додавајќи дека растот на увозот ја одразува растечката европска побарувачка за електрични возила.
