Челниците на Денвер Нагетс му го дале дресот со број 15 на Никола Јокиќ само за да го понижат Кармело Ентони, кој го носеше дресот на овој клуб од 2003 до 2011 година, тврди овој поранешен кошаркар.
Поранешната ѕвезда на Нагетс во подкастот „7PM in Brooklyn“ изјави дека потегот е направен намерно и со јасна намера да му „удри шлаканица“ и нагласи дека не заслужува такво нешто по сѐ што направил за клубот од Колорадо.
„Тоа беше нивен начин да ме повредат. Не му дозволија на Никола Јокиќ да го избере бројот, туку тие избраа да го носи дресот со број 15, што ми припаѓаше мене. Покажаа големо непочитување и сакаа на тој начин да ми удат шлаканица“, рече Кармело Ентони во споменатиот подкаст и додаде:
„Никогаш не кажав ништо лошо за луѓето од Денвер или за Нагетс како клуб, а тие сакаа да ме избришат. Како нивната цел да беше да му кажат на целиот свет дека повеќе не постојам. Тоа беше направено намерно и не беше фер од нивна страна.
Но, она што Кармело Ентони не го кажа е фактот дека и Никола Јокиќ за време на престојот во белградски Мега Баскет го носеше дресот со број 15, па постојат сите шанси токму поради таа причина да му е даден токму овој број.
Покрај тоа, Никола Јокиќ не е првиот играч кој ја носи петнаесетката откако Кармело Ентони ги напушти Нагетс, бидејќи во сезоната 2013/2014 таа му припадна на Ентони Рендолф.
Ентони се пензионираше во 2022 година, една недела пред да наполни 38 години. Последната сезона ја одигра за Лос Анџелес Лејкерс, а претходно покрај Денвер играше и за Портланд Треил Блејзерс, Хјустон Рокитс, Оклахома Сити Тандер и Њујорк Никс.
Инаку, Ентони во НБА влезе во 2003 година кога беше драфтуван од Денвер, а откако стана шампион на НЦАА со Сиракјуз Оринџмен. Потоа за Нагетс одигра 7 и пол сезони.
Со репрезентацијата на САД освои злато на ЛОИ во 2008, 2012 и 2016, а стана и шампион на Америка во 2007.
