Манчестер Сити направи огромен чекор кон одбрана на титулата во Премиер лигата откако го совлада водечкиот Арсенал со 4:1 во дербито од 33. коло на англискиот шампионат.
Сити сега има два бода помалку од Арсенал, но и два натпревари помалку, игра во фантастична форма и ита кон нова титула. Ерлинг Холанд го искористи дербито меѓу двете најдобри селекции во Англија за историски рекорди.
Фантастичниот 22-годишен норвешки напаѓач се запиша меѓу стрелците на крајот од натпреварот кога го искористи додавањето на Фил Фоден за гол во 95. минута. Голот беше негов 33-ти во 29-от првенствен натпревар во сезоната, што значи дека го собори рекордот во Премиер лигата за најмногу постигнати голови во 38 натпревари. До крајот на натпреварувањето, Сити има уште седум натпревари.
Рекордот во моментов го држи Мохамед Салах од Ливерпул од сезоната 2017/2018 со 32 гола. За да стане апсолутен рекордер по бројот на голови во една сезона од англискиот шампионат, му недостига само уште еден гол. Овој рекорд заедно го држат Ендрју Кол и Алан Ширер, кои постигнаа по 34 гола во сезоните 1993/1994 (Кол), односно 1994/1995 (Ширер) кога во англискиот шампионат играа 22 клуба. Сезоната тогаш беше подолга за четири натпревари.
Исто така, Холанд, кој ја игра првата сезона во Премиер лигата, со голот против Арсенал успеа да израмни рекорд стар 71 година. Тоа се однесува на бројот на голови постигнати во англиското првенство од небритански играч. Досега со 33 гола го држеше Чилеанецот Хорхе Робледо од сезоната 1951/1952.
33 - Ерлинг Холанд (Манчестер Сити, 2022/2023)
32 - Мохамед Салах (Ливерпул, 2017/2018)
31 - Луис Суарес (Ливерпул, 2013/2014)
31 - Кристијано Роналдо (Манчестер Јунајтед, 2007/2008)
31 - Алан Ширер (Блекбурн, 1995/1996).
