Манчестер Сити и Интер вечерва се борат за титулата во Лигата на шампионите, а Ерлинг Холанд не е во најдобрата форма.
Постигна само еден гол на последните седум натпревари, што е негов најлош голгетерски период откако дојде од Борусија Дортмунд.
„Можете да видите дека постигнав еден гол на последните 7 натпревари или дека постигнав 52 гола на 52 натпревара, а плус имав и 8 асистенции. Барем јас така мислам. Јас всушност имав 9 асистенции, но кој ги брои... Не сум под стрес, се чувствувам многу добро“, прокоментира тој за британски The Guardian и додаде:
„Клучот е да работите напорно секој ден и да уживате во она што го работите. Немам поставено никаква цел за тековнава сезона, ме интересира само дали ќе победи мојот тим. Не ми е грижа за индивидуалните награди и не размислувам за Златната топка“.
„Освојувањето на Лигата на шампионите е мојот сон од кога се сеќавам. Го сакам овој натпревар. Кога имав седум години (2008 година) ги гледав Челси и Манчестер Јунајтед во финалето на Лигата на шампионите. Кога ги видов играчите на Јунајтед како слават, сакав да го направам истото“.
Холанд ја коментираше и сезоната и објасни како се чувствува пред финалето:
„Не очекував да постигнам толку голови оваа сезона, но можев да постигнам повеќе. Имаше натпревари каде што пропуштив неколку шанси, но ништо не можете да направите за тоа. Го чувствувам притисокот. Ќе излажам ако кажам дека не го чувствувам тоа. Тука сум да направам нешто што никогаш не сме го направиле во историјата. Ќе дадам сѐ од себе“, заврши Норвежанецот.
