Откако Хрватска испадна од континенталниот собир, некој примети дека шаховницата на хрватското знаме не е онаа државната, туку старата усташка шаховница.
На сите четири натпревари кои „Ватрените“ ги одиграа на Европското првенство, три во групната фаза и оној синоќа во осминафиналето против Шпанија, ги играле со знаме на кое стоела погрешка шаховница.
Станува збор за тешко приметлива разлика која за некој да ја открие треба навистина да се потруди. Знамето на Хрватска го сочинуваат тробојката со државниот грб на средина. А, пак, државниот грб е составен од пет мали штитови кои формираат круна врз голем штит на кој се наоѓа шаховницата.
Шаховницата која ја користи Хрватска денес има 13 црвени и 12 бели полиња со тоа што почнува со црвено поле од горе.
За разлика од неа, шаховницата која ја користеле усташите е обратна: има 13 бели и 12 црвени, а почнува со бело поле. Токму ваква шаховница се наоѓаше на дресовите на Хрватска на ЕУРО.
Пракса на ЕУРО е на дресовите на секоја репрезентација за секој натпревар да стојат градот, датумот и знамињата или имињата на двете репрезентации кои го играат натпреварот.
Разликата беше само кај знамињата на хрватските дресови. Така на пример репрезентациите на Чешка и Шкотска, кои играа против Хрватска, на нивните дресови го имаа правилното знаме на Хрватска, но самите Хрвати успеаја да го погрешат. Англија и Шпанија на дресовите не ставаа знамиња, само букви.
Останува отворено прашањето како дошло до ваква грешка. Задолжени за овие додавки на дресовите се економите на репрезентациите. Оттаму и прашањето како хрватскиот економ, не еднаш туку четири пати, успеал да го згреши знамето?
Со оглед на тоа што знаме со ваква комбинација Хрватска никогаш во историјата немала, буди сомнеж дека е намерно така направено.
Од ХНС се извинија за пропустот преку портпаролот Томислав Пачак.
„Печатењето на спортската опрема на хрватската репрезентација го прави компанијата Sitotisak Decolor, вклучувајќи ги и знамињата на земјите за одредени натпревари. За жал, имаше ненамерна грешка при рачното векторско цртање, а потоа и при печатењето на хрватското знаме за Европско првенство, што не беше забележано“, рече Пачак.
„Ѝ се извинуваме на јавноста и на хрватските навивачи за овој пропуст. Се разбира, ХНС ја отфрла секоја мисла дека станува збор за намерно нарушување на хрватскиот грб, што хрватските репрезентации со години гордо го претставуваат низ целиот свет", додаде тој.