Тренерот на англискиот премиерлигаш Ливерпул, Јирген Клоп, изјави дека невакцинираните играчи претставуваат ризик по здравјето и дека неговиот клуб најверојатно нема како засилувања да донесе играчи кои ќе одбијат да се вакцинираат.
И тренерот на Астон Вила, Стивен Џерард, и на Кристал Палас, Патрик Виеира, исто така минатата недела изразија сличен став дека статусот на вакцинација на играчите ќе биде еден од условите за трансфери во зимскиот преоден рок.
Според Премиер лигата, 68 отсто од нејзините играчи биле вакцинирани со две дози во октомври, но во понеделникот објави рекордни 42 случаи на инфекција меѓу играчите, што одложи дури десет натпревари.
„Ние не сме за потпишување договор со некои играчи, но размислував за тоа и тоа ќе влијае на трансферите“, изјави Клоп, кој претходно беше неодлучен по тоа прашање.
„Доколку некој играч воопшто не е вакциниран, тој е постојана закана за сите нас... Што се однесува до организацијата, тоа создава голем хаос. Ако навистина сакате да ги следите протоколите, навистина е тешко. Ако еден играч добие ковид, а другите биле со него, тогаш сите одат во изолација. Така што, ќе влијае. Нема да изградиме зграда за невакцинирани играчи. Се надеваме дека нема да биде потребно“, додаде тој.
Ливерпул, втор на табелата со 40 бодови по 17 кола, игра денеска против седмопласираниот Тотенхем кој нема играно од 5 декември и има два одложени натпревари поради големиот број заразени со коронавирус во тимот.
