Веднаш штом го презеде кормилото на заглавената Барса, легендарниот Чави почна да воведува ред во каталонскиот гигант.
Тој најави голем број нови правила кои играчите ќе треба да ги почитуваат, а најави и спектакуларен трансфер во зимскиот преоден рок.
Каталонски El Nacional пишува дека Чави решил по секоја цена да го доведе Мохамед Салах од Ливерпул. El Nacional пишува дека и покрај тоа што финансиската состојба во клубот е лоша, Барселона наводно го привршува трансферот кој ќе одекне во фудбалскиот свет.
Египетската ѕвезда на Ливерпул моментално е еден од најсериозните фаворити за Златната топка, а неговата пазарна вредност Transfermarkt ја проценува на околу 100 милиони евра. Бидејќи Барса ги нема тие пари, многумина се прашуваат како има намера да го доведе Салах, кој има договор со „црвените“ до летото 2023 година, а на англискиот тим навистина не му требаат пари за да се ослободи од најдобриот играч.
Помош од САД и Катар
Чави инсистираше на Салах уште од првиот ден од неговото враќање во клубот, а претседателот на Барса, Жоан Лапорта побара помош во странство. El Nacional пишува дека за Салах би можеле да добијат пари од некои инвестициски фондови од САД, но и од Катар со кој има многу добри односи.
Секако дека нема да има ништо од трансферот доколку Клоп и Ливерпул одбијат, но Барса се надева дека одлуката на Египќанецот да не потпише нов договор е значајна и дека може да биде клучна за доведување на Салах на Камп Ноу.
