Одделот за внатрешна контрола, криминалистички истраги и професионални стандарди при МВР до Основното јавно обвинителство за гонење организиран и сериозен криминал поднесе кривична пријава против З.Н., полициски службеник во Полициската станица од општа надлежност при СВР Битола, поради постоење основи на сомнение за сторено кривично дело одземање или уништување службен печат или спис, казниво по член 390 од Кривичниот законик.
„На 20.2.2024, во гаражата на ОВР Крушево, каде што биле одложени на чување службени материјали за чување во картонски кутии, зел дел од кутиите со службени материјали, меѓу кои имало и документи со одреден степен на класификација, и ги фрлил во приколка на ЈП 'Комуна', која во тој момент вршела редовно подигање смет, со што уништил книги или спис што му припаѓаат на државниот орган ОВР Крушево“, соопшти МВР.
Одделот за внатрешна контрола, криминалистички истраги и професионални стандарди за пријавениот поднесе и предлог за поведување постапка за кршење на работниот ред и дисциплината и изрече задолжителна мерка отстранување од работното место до завршување на дисциплинската постапка.