Новиот тренер на Барселона, Роналд Куман ја коментираше темата за иднината на Лионел Меси на „Камп Ноу“.
– Не знам дали ќе морам да го убедувам да остане. Тој е најдобриот играч во светот и сакате да го имате во вашиот тим, а не обратно. Меси победува натпревари. Тој е фудбалер на Барселона, има договор. Од денес ќе работиме и разговараме со играчите. Се надевам дека тој ќе остане тука уште неколку години. Како ќе го убедам? Ова е лично. Јас сум тренер за да донесувам одлуки. Меси е играч на Барселона, рече Куман за време на својата презентација.
Претседателот на Барселона, Пеп Бартомеу, веќе најави вистинска револуција на „Камп Ноу“, која веќе започна со разрешувањето на Кике Сетјен и доаѓањето на Куман. Промените ќе вклучуваат разделба со многу играчи, но Бартомеу ги увери фановите дека суперѕвездата Лионел Меси нема да биде меѓу нив.
– Меси останува најдобриот фудбалер на светот. Тој е број еден и игра за нашиот клуб. Секој знае дека Лео има договор до 2021 година. Честопати разговарам со Меси и неговиот татко. Тие знаат дека во тимот доаѓа нов тренер. Меси сака да ја заврши кариерата во Барса. Тој тоа го кажал многу пати. Имав разговор со Куман, кој истакна дека Меси ќе биде во срцето на неговиот проект, изјави Бартомеу.