Интересно признание доаѓа од претседателот на Барселона кој изјави дека се надевал Меси да остане и да игра без плата поради љубовта кон клубот.
Лионел Меси летово го направи неверојатното - си замина од Барселона, од клубот каде ја мина целата сениорска кариера откако како 13-годишно дете дојде во Каталонија. Сега е во ПСЖ, во пребогатиот француски гигант, откако летово му достави понуда која не се одбива.
„Не можам да му се лутам на Меси, бидејќи го почитувам. Знам дека имаше голема желба да остане, но исто така и голем притисок поради понудата која ја доби“, вели Лапорта во разговор со RAC1.
„Сѐ навестува дека тој веќе имал понуда од ПСЖ. Сите знаеја дека има добиено многу моќна понуда. Самиот ни кажа дека понудата е одлична“.
За Меси немаше друго решение поради големата финасиска криза која ја погоди Барселона. Добро, освен идејата на Жоан Лапорта да игра беспари.
„До последен момент се надевав дека Меси ќе остане и ќе игра бесплатно. Ќе ми се допаднеше предлогот и тој ќе ме убедеше за да биде така. Знам дека и лигата ќе прифатеше такво нешто. Но, не можеме да побараме такво нешто од играч од некова класа“.
Лапорта се осврна и на шпекулациите дека тренерот Роналд Куман наскоро ќе биде отпуштен поради разочарувачките резултати.
„Одлуката е дека Куман останува. Тој е куле (вистински фанатик, заб. на прев.) како нас. Сака Барса да напредува. Си има валиден договор и треба да биде почитуван. Среќен сум со одлуката. Куман е нашиот тренер и ние сме горди што го имаме“, заврши претседателот.