Она што лани не им успеа на фудбалерите го направија фудбалерките на Англија: за прв пат нивната репрезентација стана европски шампион откако во синоќешното финале на лондонски „Вембли“ ја совладаа Германија со 2:1 по продолженија.
Ела Тун ја доведе Англија во водство во 62. минута со силен удар пред Германката Лина Магул да израмни од непосредна близина 17 минути подоцна.
Победникот беше решен во 110. минута кога Клои Кели најбрзо реагираше на една одбиена топка и погоди за големото славје на Англичанките и речиси 88.000 гледачи на преполниот „Вембли“.
Попрецизно, на стадионот имаше вкупно 87.192 гледачи, што е и рекордна посетеност кога се во прашање натпреварите од европските првенства за фудбалерки.
Англија конечно ја освои титулата во своето трето финале, додека Германците го забележаа само првиот пораз во своето деветто финале.
Многумина сметаат дека фаворизираните Германки загубија затоа што нивната најдобра играчка Александра Поп се повреди на загревањето пред натпреварот.
„Лавиците“, како што гласи прекарот на женската фудбалска репрезентација на Англија, по натпреварот ја запеаја популарната англиска навивачка песна „Football is coming home“ која масовно се пееше во Англија и минатото лето, но тогаш нивните машки колеги потклекнаа во финалето против Италија.