„Сините“ го претрпеа шестиот пораз синоќа откако загубија на гостувањето кај Лестер со 2:0, пораз кој може да биде кобен за тренерот Френк Лампард.
Домаќините уште по шест минути игра ја најавија победата кога Вилфрид Ндиди го отвори резултатот откако налета на еден отпадок и со помош на стативата ја затресе мрежата на немоќниот Едуард Менди.
На четири минути пред паузата Џејмс Медисон го дуплираше водството откако доби една длабочинска топка од Марк Олбрајтон. Претходно, Медисон имаше и одлична шанса кога со убав шут ја затресе пречката.
Ова е 12-та победа за Лестер сезонава со која барем до вечер ќе биде на чело на табелата, а ќе очекува кикс на тимовите од Манчестер, Сити и Јунајтед.
Затоа, пак, во небрано е Френк Лампард чија иднина во Челси е и тоа како неизвесна. Вестите од Островот говореа дека пораз од Лестер ќе значи отказ, па останува да видиме дали Роман Абрамович ќе се реши дека е време за разделба.
„Ја прифатив оваа работа знаејќи дека ќе имам тешки моменти бидејќи овој клуб не е подготвен да се носи со големите. Имавме забрана за трансфери, имаме млади играчи, имаме нови играчи, играчи кои се желни да влезат во форма и да се прилагодат на овој тим“, рече Лампард на прес-конференцијата по натпреварот синоќа.
Но, потоа прстот го впери кон играчите обвинувајќи дека дел од нив не играат како што тој очекува.
„Има играчи кои не играат онака како што треба да играат. Јас бев играч и знам дека тие се единствените кои можат да се справат со тоа. Генералниот заклучок од нашиот настап е дека бевме бавни, се влечевме, како да немавме желба да трчаме, а тоа доаѓа поради недостиг на самодоверба. Нѐ победи подобар тим“, рече тој.