Роберт Левандовски претходните два дена ги помина во Минхен каде се прости од поранешните соиграчи и од вработените во Баерн.
33-годишниот полски напаѓач кариерата ја продолжува во Барселона.
Левандовски не дојде со празни раце на збогувањето од соиграчите во Минхен. Сите во клубот од него добија шампањ Armand de Brignac што чини околу 300 евра, а покрај тоа, сите го добија неговиот потпис со фотографии направени во изминатите осум години кои ги помина во најголемиот германски клуб.
„Беше тажно, но сега можам да продолжам со чисто срце. Секогаш ќе бидам благодарен за она што го стекнав и доживеав овде. Им се заблагодарив на сите за она што го направија за мене и им дадов подароци. Тоа беше емотивен и тежок момент за мене“, изјави Левандовски.
На разделбата тој се смири со спортскиот директор на Баерн, Хасан Салихамиџиќ. Постигнат е договор повеќе да не се прозиваат преку медиумите. Претходните денови Салихамиџиќ јавно кажа дека однесувањето на Левандовски е дно откако Полјакот побара трансфер.
„Сè е во ред. Разговарав со сите и им се заблагодарив за сè“, изјави Левандовски за разговорот со Салихамиџиќ.
