Ромелу Лукаку е очаен да остане во Интер и по оваа сезона, а за да го оствари тоа подготвен е на драстично намалување на платата.
Белгискиот напаѓач летоска се врати во Интер преку позјамица вредна 8 милиони евра, со што доби шанса да си ја врати формата по проблематичната сезона во клубот од Западен Лондон.
Но, и оваа сезона е тешка за 29-годишниот Ромелу, кој во 15 настапи во Серија А постигна само 3 гола, а Интер веќе се изјасни дека ќе го врати во Челкси откако во јуни ќе му заврши позајмицата.
Tuttosport известува дека Лукаку не сака ни да слушне за такво сценарио и јасно ѝ ставил дознаење на управата на Интер дека е подготвен на драстично намалување на платата само за да остане во редовите на „Нераѕурите“.
Трансферот на Лукаку го чинеше Челси баснословни 113 милиони евра во август 2021, а тогаш потпиша петгодипшен договор до јуни 2026 година. Според овие бројки, во ниту една теорија Интер не би можел да го откупи неговиот договор, освен доколку Челси се согласи на значително намалување на откупната сума, што реално не е за очекување.
Останува Челси да му дозволи на Лукаку и наредната сезона да ја мине како позајмен, а тоа е за очекување да се случи бидејќи „Сините“ не би имале корист од фудбалер кој не е среќен во Лондон и воедно не е во форма. Со нова позајмица барем ќе заштедат пари на неговата огромна плата, која сега тој е подготвен драстично да ја намали за да може Интер да си го дозволи.
Лукаку на репрезентативната пауза покажа знаци на враќање на голгетерската форма откако постигна 4 гола на два натпревара. Прво ѝ даде хет-трик на Шведска на гости во победата од 3:0 во квалификациите за ЕУРО 2024, а потоа еднаш погоди и против Германија во пријателската во Келн која Белгија ја доби со 3:2.