Патејто е мачор на кој поради постојаните тумори морало да му ги извадат ушите, а благодарение на својот необичен изглед стана ѕвезда на социјалните мрежи.
Патејто (компир, од англиски potato) имал тежок почеток во животот како скитник во Кина, а Карл Леон и неговата сопруга првенствено посвоиле друга мачка, Хорлик, а подоцна се вратиле по неговиот пријател Патејто, кој тогаш сè уште ги имал двете уши.
„Патејто живееше како скитник во Кина со Хорлик и некои други улични мачки. Подоцна го прими една старица од Хонгконг, но за жал таа почина во 2016 година“, изјави Карл за локалните медиуми.
„За него се грижеше локалното засолниште за мачки. Во меѓувреме, јас и мојата сопруга ја посвоивме Хорлик, нашата прва мачка, во 2018 година. По неколку месеци решивме да посвоиме друга мачка, па повторно го посетивме засолништето и го избравме Патејто бидејќи тој е стар пријател на Хорлик“, додаде тој.
За жал, на Патејто му бил дијагностициран тумор на ушните канали и ушите. За среќа, слухот на мачорот бил спасен иако тој на крајот морал да биде подложен на тричасовна операција за отстранување на ушите.
Неговите сопственици правеле профили за своите миленици на социјалните мрежи, а Патејто ги освоил сите со својот необичен изглед.
„Мислам дека тој е посебен и носи позитивна енергија кај другите на Instagram. Верувам дека социјалните мрежи треба да бидат место за споделување среќа“, вели неговиот сопственик.
